Ս. Աստուածածնայ Վերափոխման Տօնին Առիթով. Խաղողօրհնէք` Հալէպի Հայկական Եկեղեցիներուն
Մէջ
Հալէպի դիմագրաւած ներկայ ծանր օրերուն ընթացքին ուրախալի է լրատուութիւններէն կարդալ,
որ, այսուամենայնիւ, կեանքը կը շարունակուի: Ըսուածին լաւագոյն ապացոյցներն են Հալէպի
մէջ «Երկիր Մետիա» պատկերասփիւռի կայանի թղթակիցին ստորեւ տրուած տպաւորութիւնները:Բաւական տաղտկալի շաբաթ էր անցնող շաբաթը: Զինեալ արմատական խմբաւորումները կը յայտարարէին, որ արաբական Ֆիթրի տօնին Հալէպի մէջ իսլամական իշխանութիւն պիտի հաստատեն:
Ֆիթրի չորս օրերը անցան, ցարդ նման իշխանութիւն չյայտարարուեցաւ: Հալէպի մէջ սղաճն ու անապահովութիւնը տակաւին կը շարունակուին: Սնունդի խնդիրը լուծուեցաւ, սակայն սակագիները անբնական ու անընդունելի են:
Անցնող շաբթուան ընթացքին պետական համապատասխան կառոյցները Հալէպի մէջ ականուած երեք ինքնաշարժներ յաջողեցան բացայայտել եւ ականները քակել:
Այս շաբթուան մէջ արձակազէնի կրակոցով երկու, պաղ կապարով մէկ եւ հրասանդի բեկորով մէկ հայորդի վիրաւորուեցան:
Շաբաթավերջին 6 հայեր Հալէպէն Երեւան ճամբորդելու ընթացքին թրքական սահմանին մօտակայ Հալէպի գիւղերէն մէկուն մէջ առեւանգուեցան: Առեւանգուողներէն երկուքը կիներ էին, որոնք վերադարձուեցան Հալէպ, իսկ 4-ը տղամարդիկ, որոնցմէ մէկը մեքենավարն էր: Անոնց ճակատագիրը ցարդ անյայտ է:
Հովանաւորութեամբ Պետրոս արք. Միրիաթեանի, կազմակերպութեամբ Հայ կաթողիկէ միութեան, «Աղաճանեան» սրահին մէջ եւ երեք օրերու տեւողութեամբ ներկայացուեցաւ «Հայրիկը» գեղարուեստական երեկոն:
Կիրակի, 11 օգոստոսին Հալէպի հայկական եկեղեցիները կատարեցին խաղողօրհնէքի արարողութիւն: Բաւական դժուար պայմաններու մէջ կը շարունակուի Հալէպի կեանքը:
| All the contents on this site are copyrighted ©. |